ETH Bröötlete

Es isch es ewigs hii und her gsii, es sind jeenschtii Vorschlääg und Inputs ine cho und es sind alli alles anderii als schlecht gsii, aber letschtendlli sim mer bim uursprünglich plante blibe und sind id ETH. Aber moment mal, um was gahts überhaupt? Nach em Motto Party-loses Wuucheend oder so ähnlich, d interpretation devo isch eigentlich jedem selber überlah gsii, hem mer eus entschiide, anstatt wieder eimal meh d Nacht dure z Stampfe, eus en schöne Namitag, Abig, Nacht, Morge z mache und bii Grilliere, Bier und guuter Luune d Ziit z gnüüse. Nach ere aastrengende iichaufs-session isch es denn endli los gange. 4 Lüüt sim mer gsii, mit de erwartig das no einige meh werdet cho. Vo Oerlike mit em Bus id ETH ufe düüset isch de müehsamschti teil vo dere gschicht cho: De ganz huere seich ufe z schleppe. Wo das denn endli mal gschafft gsii isch und mer euses Plätzlii iigirichtet, s Bier chalt gstellt, und s füür brennt het sind paar schööni gmeinsammi stunde uf eus zue cho. Mer het mitenand über dies und das gredet, isch i de Wiise glege, oder het stink frech vo lings und rechts wild umenander knipst. Da am Morge grad mis neue Objektiv mit de Poscht aacho isch, han ichs natüürli nöd chöne lah sii mini Cam mit z neh, und au wenns für mich einigi Kilo a zuesätzlichem Gepäck bedütet het, muss i sege, es het sich meh als nur glohnt. D Bäum hend, mit de tüüf i fallende Suune es Liechtspiel bote, das es e wahri freud gsii isch wild druf los z knipse. D Ergebnis sind uf jedefall Genial worde. Danke das er das ganze über euu ergah lah hend, ich weiss ich bin nervig gsii mit mim riise rohr permanent uf eu griichtet, aber ich hoffe die Bilder lönd eu nomal drüber weg gseh:

Traum Location...

Zum schluss no chli experimentelli, Kreativi, Sache ;D

Danke eu allne vielmal für die wunderschööni Ziit, het extrem spass gmacht. Falls er d Bilder wend: entweder vo da use kopiere, oder mir sege, denn schick is eu no in orginaler uuflösig.

Hoffentli bis bald und bis det ane e guetii ziit :)

SoNnEzAuBeR

Uf die Party han ich mich ehrlich gseit scho sit sehr langer Ziit gfreut. Vor langer ziit devo erfahre, isch d Luscht a die Party z gah denn au gnueg gross gsii, s schlechti Wetter hine Lings z ligge lah und mich uf d Söcke z mache.

Nachere luschtige Schüttelbusfahrt sind mer denn au scho bald im tüüfe, dunkle Wald gstande. Immer de Musig nah, sim mer dur de Wald gstampfet, bis mer denn endlich am Ziel vo eusere Reis aaglangt sind. Es het eus e chliini, perfekt in Wald ine baschtleti Party aatroffe, mit viele viele tolle Lüüt und super Musig. Nume de Platz isch für min Gschmack e chli fehlend gsii, bzw. wenn mer chli nebet usse gstande isch, het d Luutstärchii vo de Musig doch bereits sehr starch abgno. Aber nichts desto trotz, mir hend, nöd z letscht weg de obe gnännte Gründ, vo dem chliine Pünktli abgseh und e super Party gfiiret. Und vonere Super Party gits natürli au Super Föteli, d Uuswahl isch dasmal zwar recht chlii usgfalle, aber ufgrund vo starchem Hunger hend mir eus beschlosse, die Party mit wehmuet früehziitig z verlah. 

Aber lueget doch eifach selber:

Wunderschönii Deko...

Wieder eimal meh, danke a d Füürakrobate, ihr hend wieder super arbeit gleischtet! :)

Uf em heii Wääg sim mer denn no 2 Blaue Mänli begegnet.. Zum Glück hends nüüt vom Grüene gschmöckt :) Es Föteli hends aber (us eus unerklärliche Gründ) nöd mit eus welle mache.
Und so sim mer gmüetlich mit em Schüttelbüsli zrugg i de Normali Wahnsinn tückerlet.
Bim uf de Bus warte sim mer denn no dene luschtige Cheibe da begegnet:

Viele viele Dank für die wunederschööni Party. Es isch wunderbar gsii.

Bis bald, a de nächschte Goa, oder susch irgendwo im Chruut. Blibet gsund, blibet Happy und bhaltet d Sunne i euem Herze <3

Eue Goa-Blogger-Kopp

Hakuna Matata

Hakuna Matata... Diesen Spruch sag ich gern...

Ja ich han mich gfreut uf die Party, nach dem sie um fascht enen Monet Verschobe worde isch, bin ich mit grosse Erwartige und guete Luune a die Party gange.

De erscht iidruck: Es sind Platzmässig recht viel Lüüt cho, es isch teilwiis recht eng worde und meh het nöd sehr viel Platz gha... De Sound het sehr Flach tönt, meh het kein Bass useghört und meh het aagfange werweise ob das jetzt a de Aalag liit oder a was susch...

S Sound-Problem het sich mit em neue DJ denn recht rasch behobe, die Kicks sind wie Peitscheschlääg iigfahre, und de Bass het eim richtig de Mage dure gschüttlet, d Lüüt sind begeischteret gsii.

Nöd so begeischteret gsii, isch defüür unser aller Freund und Helfer gsii, wo scho zimli bald durfabe iigfahre isch, und die Party dademit für beendet erchlärt het. Mit em Sound Stop und em abschalte vom Generator sind denn au die meischte Lüüt abzoge.

Aber ich han mich entschlosse no bitz abzwarte, irgendwas im Hinderchopf het mer gseit: Die Party wird wiiter gah, und dem war auch so, nach 1-2 Stunde (ich han amigs keis Ziitgfüühl meh a so Partys) und viele interessante Gspröch isch die Party wiiter gange. Inzwüsche het mer au aagnehm Platz becho, und es het richtig Spass gmacht.

Aber ich bin ja eigentlich a die Party gange zum schöni Bilder z mache, und die wott ich eu natürlich nöd vorenthalte, da sinds:

Danke au speziell a alli Füürkünschtler, het wunderschönii Bilder gehh:

Da no paar Bilder vom Morge...:

...und vo nach de Party:

Danke eu allne für die toll Party, isch hammer gsii. Das Wuucheend chan i leider nöd underwegs sii, will i es Klasseträffe han. Aber ihr werdet mi mit e bitzli glück sicher scho bald wieder anere party aatreffe ;)

Hebet eu Sorg, und bis bald.